नन्वज्ञानस्य भवद्भिरप्यङ्गीकारात्तन्निराकरणं व्याहतमिति शङ्कते ॥ न चेति । परमत एवैते दोषा नास्मन्मत इत्याह ।। परेति । स्वमते तु स्वभावाज्ञानवादस्य निर्दोषत्वान्न तद्भवेदित्यादौ शास्त्रे तद्व्युत्पादनं व्यक्तमिति भाव: । स्वसमानाधिकरणात्यन्ताभावप्रतियोगित्वं मिथ्यात्वमिति पक्षं प्रतिक्षिपति || न सप्तम इति ।। असत्त्वेति । स्वरूपेणात्यन्ताभावास्यासत्त्वे पर्यवसानादिति भावः । तदतिरिक्तस्येति । स्वरूपेणात्यन्ताभावप्रतियोगित्वादन्यस्यासत्त्वस्येत्यर्थः ॥ भावेति । सद्वैलक्षण्यमित्यर्थः । तथा च सद्वैलक्षण्यादेवासत्त्वापत्त्याऽपसिद्धान्तदोषस्यानिवृत्तिरित्याह ॥ तर्हीति । प्रतिज्ञांशदोषमुपसंहरति । तस्मादिति ।। छ ।