ननु मास्त्वभेदानुमानं विरोधि भेदमिथ्यात्वानुमानं तु भेदसत्यत्वविरोधीति भावेन शङ्कते ॥ भेद इति । विमत इति शेषः ॥ चन्द्रेति । अङ्गुल्यवष्टब्धनेत्रेण दृश्यमानचन्द्रभेदवदित्यर्थः ।। साध्यानिरुक्तेरिति । प्रागुक्तमिथ्यात्वविकल्पदोषाणामापत्तेरित्यर्थः । साधनवैकल्यमेवोपपादयति । तत्रेति । चन्द्रे चन्द्रभेदस्य असत्त्वेन भेदसामान्याभावादित्यर्थः । ननु चन्द्रे चन्द्रभेदस्य वास्तवस्याभावेऽप्यारोप्यस्य चन्द्रभेदस्य चन्द्रे सत्त्वेन तत्रारोपितं भेदत्वमप्यस्तीति शङ्कते ॥ परमार्थत इति ॥ तादृशस्येति । बाधितस्येत्यर्थः (आरोपितस्येत्यर्थः ) । तथा चासिद्धिरित्यर्थः । ननु बाधितत्वाबाधितत्वरूपविशेषौदासीन्येन भेदत्वमेव हेतुरस्त्वित्याशङ्क्य सदृष्टान्तमसिद्धिमाह || अवधूयेति । ननु तत्रापि धूमत्वसामान्यमस्त्वित्यत आह ।। अन्यथेति । छ ।